சூர்யா நடிப்பில் கடைசியாக திரையரங்குகளில் வெளியான படம் ‘ரெட்ரோ’. இந்தப் படம் கலவையான விமர்சனங்களைப் பெற்றது. இதையடுத்து ஆர்.ஜே.பாலாஜி இயக்கும் ‘கருப்பு’ படத்தில் நடித்து முடித்துள்ளார் சூர்யா. இந்தப் படம் விரைவில் திரையரங்குகளில் வெளியாக இருக்கிறது. இதைத் தொடர்ந்து சூர்யா நடிக்கும் 46-வது படத்தை ‘லக்கி பாஸ்கர்’ பட இயக்குநர் வெங்கி அட்லூரி இயக்குகிறார்.

இந்தப் படத்துக்கு ‘விஸ்வநாத் அன்ட் சன்ஸ்’ என தலைப்பிடப்பட்டுள்ளது. இதில் சூர்யாவுக்கு ஜோடியாக மமிதா பைஜூ நடிப்பதாக கூறப்படுகிறது. ஜி.வி.பிரகாஷ்குமார் இசையமைக்கிறார். இந்நிலையில் இந்தப் படத்தின் ஃபர்ஸ்ட் லுக் போஸ்டரை படக்குழு வெளியிட்டுள்ளது. இதில் குழந்தை சுமந்துகொண்டு சூர்யா நிற்கிறார். மற்றொரு போஸ்டரில் அதே குழந்தையை பார்த்தபடி அமர்ந்திருக்கிறார்.

அண்மைக்காலமாக சூர்யா ரத்தம், வன்முறை என ஆக்ரோஷமான ஆக்ஷன் படங்களில் நடித்து வந்த சூர்யா, நீண்ட இடைவெளிக்குப் பிறகு குடும்ப பின்னணியில் உருவாகும் படத்தில் நடிக்கிறார். படத்தின் போஸ்டர் ரசிகர்களின் கவனத்தை ஈர்த்துள்ளது. ஒரே நேரத்தில் தமிழ், தெலுங்கில் உருவாகும் இந்தப் படம் ஜூன் மாதம் திரையரங்குகளில் வெளியாகும் என கூறப்படுகிறது.