கன்னட சினிமா மற்றும் தொலைக்காட்சித் தொடர்களில் நடித்து மக்களின் இதயங்களைக் கவர்ந்த திறமையான நடிகர் ஹரிஷ். கர்நாடக மாநிலம் குடகு மாவட்டம் குஷால்நகர் தாலுக்காவில் உள்ள அனேகாட் வனப்பகுதிக்கு அருகே, ஹரிஷ் ஓட்டிச் சென்ற கார் சாலையோரம் நிறுத்தப்பட்டிருந்த டேங்கர் லாரியுடன் மோதியதில் இந்த கோரமான விபத்து ஏற்பட்டது. இதன் விளைவாக, ஹரிஷ் படுகாயமடைந்து உயிரிழந்தார்.

இவரும் குடகு மாவட்டத்தைச் சேர்ந்தவர் தான். ஹரிஷ் ஓட்டிச் சென்ற கார், தேசிய நெடுஞ்சாலை 275-ல் அனேகாட் அருகே நிறுத்தப்பட்டிருந்த ஒரு டேங்கர் லாரியுடன் மோதியது. நேற்று நடந்த இந்த விபத்தில் 40 வயதான ஹரிஷ் பலத்த காயங்கள் அடைந்த நிலையில் உயிரிழந்ததாகத் தெரிவிக்கப்பட்டுள்ளது.

ஹரிஷ் வேலையை முடித்துவிட்டு குஷால்நகரிலிருந்து தனது சொந்த ஊரான ஹோஸ்கோட்டிற்கு காரில் சென்று கொண்டிருந்தார். அப்போது தான் சாலையின் ஓரத்தில் நிறுத்தப்பட்டிருந்த டேங்கர் லாரி மீது அவரது கார் மோதியது. மோதிய வேகத்தில் கார் முற்றிலுமாக நசுங்கிப் போனதாகக் கூறப்படுகிறது. இந்த விபத்தில் நடிகர் ஹரிஷ், சம்பவ இடத்திலேயே உயிரிழந்ததாகத் தெரிவிக்கப்பட்டுள்ளது.

விபத்து குறித்த தகவல் கிடைத்ததும், குஷால்நகர் போலீஸார் சம்பவ இடத்திற்கு விரைந்தனர். எனினும் ஹரிஷ் உயிரை காப்பாற்ற முடியவில்லை. இந்த விபத்து தொடர்பாக வழக்கு பதிவு செய்யப்பட்டு, காவல்துறையினர் விசாரணையைத் தொடர்கின்றனர். 40 வயதான ஹரிஷ், நடிகராக பல திரைப்படங்களிலும் தொலைக்காட்சித் தொடர்களிலும் நடித்திருந்தார். வில்லன் வேடங்களில் நடித்து மக்களின் இதயங்களை வென்றிருந்தார். ஹரிஷின் மறைவால் கன்னட சினிமா சோகத்தில் ஆழ்ந்துள்ளது.