மதுரை மாவட்டம், மண்டேலா நகரில் இன்று என்.டி.ஏ. கூட்டணியின் பிரச்சாரப் பொதுக் கூட்டம் நடைபெற்றது. இதில், பிரதமர் நரேந்திர மோடி பங்கேற்று உரையாற்றினார். இந்தக் கூட்டத்தில் பேசிய பிரதமர் மோடி, “25 ஆண்டுகளுக்கு பிறகு 2021ல் தான் திமுக முழு மெஜாரிட்டியை பெற்றது. ஆனால், திமுக சிறந்த ஆட்சியை கொடுக்கவில்லை. எம்.ஜி.ஆர்.க்கு உறுதுணையாக நின்றது மதுரை. அதன் காரணமாக திமுக அரசு, மதுரையை விரும்பவில்லை. மாஃபியா அரசியலை செய்கிறது. திமுக அரசு எது வேண்டுமானாலும் செய்யட்டும். ஆனால், இறுதியில் வாய்மையே வெல்லும். முருகனே வெல்வார்” என பேசினார்.

கூட்டம் முடிந்து பிரதமர் நரேந்திர மோடி டெல்லி புறப்பட்டுச் சென்ற நிலையில், தமிழ்நாடு பாஜக தேர்தல் பொறுப்பாளரும் மத்திய அமைச்சருமான பியூஷ் கோயல், எதிர்க்கட்சித் தலைவரும், அதிமுக பொதுச் செயலாளருமான எடப்பாடி பழனிசாமி ஆகியோர் முன்னிலையில், என்.டி.ஏ. கூட்டணி தலைவர்கள் மதுரையில் உள்ள ஓட்டலில் ஆலோசனையில் ஈடுபட்டனர்.

தொகுதி பங்கீடு குறித்து ஆலோசனை என முதலில் தகவல் வெளியான நிலையில், ஆலோசனை முடிந்து வெளியே வந்த தலைவர்கள் அதனை மறுத்துள்ளனர்.

தொடர்ந்து அங்கு செய்தியாளர்களைச் சந்தித்த தமிழ்நாடு பாஜக தேர்தல் பொறுப்பாளரும் மத்திய அமைச்சருமான பியூஷ் கோயல், “மதுரையில் பிரதமர் நரேந்திர மோடி பங்கேற்ற என்.டி.ஏ. பிரச்சாரக் கூட்டத்திற்கு மக்களை வரவிடாமல் தடுக்க முதலமைச்சர் மு.க. ஸ்டாலின் தலைமையிலான திமுக அரசு முயற்சித்தது. காவல்துறை சரியான நடவடிக்கை எடுக்கவில்லை. சுமார் 15 கி.மீ. தூரத்திற்கு வாகன நெரிசல் ஏற்பட்டது. ஆனால், மதுரையில் நடைபெற்ற என்.டி.ஏ. கூட்டணி பிரச்சாரக் கூட்டத்திற்கு பெரிய அளவில் வந்தனர். அவர்களுக்கு எனது நன்றி” எனத் தெரிவித்தார்.