ஆந்திர எல்லையிலிருந்து தப்பித்த கார், தமிழ்நாடு எல்லைக்குள் நுழைந்த நிலையில், அம்மாநில அதிகாரிகள் உடனடியாக தமிழ்நாடு வனத்துறையினருக்குத் தகவல் அளித்து உஷார்படுத்தினர். பரதராமி சோதனைச்சாவடியில் பேரி கார்டு அமைத்து சம்பந்தப்பட்ட காரை வனத்துறையினர் தடுத்து நிறுத்த முயன்றபோது, அங்கிருந்து தப்பிய கார், வேகமாக குடியாத்தம் நோக்கி வந்துள்ளது. அதற்குள் குடியாத்தம் வந்த ஆந்திர வனத்துறையினர் தமிழக வனத்துறையினருடன் சேர்ந்து, கடத்தலில் ஈடுபட்ட காரை, சினிமா படப் பாணியில் சேசிங் செய்தனர்.

குடியாத்தம் அருகே உள்ள பாக்கம் பகுதியில் அதிவேகமாக வந்த கார் கட்டுப்பாட்டை இழந்து பள்ளத்துக்குள் கவிழ்ந்து விபத்துக்குள்ளானது. அப்போது காரில் இருந்த மூன்று பேர் தப்பி ஓடிய நிலையில், அவர்களில் இருவர் மட்டும் படுகாயங்களுடன் பிடிபட்டனர். பின்னர் சுமார் 500 கிலோ எடையுள்ள இரு செம்மரக்கட்டைகளையும், காரையும் பறிமுதல் செய்தனர். மேலும், படுகாயம் அடைந்த இருவரை குடியாத்தம் அரசு தலைமை மருத்துவமனையில் சிகிச்சைக்காக அனுமதித்த நிலையில், தற்போது அவர்களிடம் தீவிர விசாரணை மேற்கொண்டு வருகின்றனர்.