ஓஎம்ஆர் சாலை துரைப்பாக்கம் சிக்னல் அருகே கியா கார் ஒன்று மிக அதிவேகமாக வந்துள்ளது. காருக்குள் அமர்ந்திருந்தவருக்கு கட்டுப்பாடு இல்லாததால், காரும் கட்டுப்பாடு இல்லாமல் தறிகெட்டு வந்துள்ளது. சாலையில் சென்றவர்கள் எல்லோரும் உயிரை கையில் பிடித்துக்கொண்டு ஓரமாக ஒதுங்கிச் சென்றனர். இருப்பினும், கட்டுப்பாட்டை இழந்த அந்த கார், சாலை ஓரமாக நடந்து சென்றுகொண்டிருந்த ஒரு பெண் மீது பயங்கரமாக மோதியதில் அவர் படுகாயமடைந்தார்.

அதேபோல் சாலையில் சென்று கொண்டிருந்த வடமாநில இளைஞர் மீது மோதியதில் அவருக்கு கை உடைந்தது. இரண்டு பேர் மீது மோதியபோதும் அந்த போதை ஆசாமி காரை நிறுத்துவதாக இல்லை. ஐந்து விபத்துக்களையாவது ஏற்படுத்தினால்தான் ஆத்ம திருப்தி கிடைக்கும் என்கிற நோக்கத்தில் அடுத்தடுத்து விபத்துக்களை அரங்கேற்றியபடி சென்று கொண்டிருந்தார்.

துரைப்பாக்கம் சர்வீஸ் சாலையில் நின்று கொண்டிருந்த மற்றும் சென்று கொண்டிருந்த வாகனங்கள் மீது அடுத்தடுத்து மோதி விபத்துக்களை வரிசையாக ஏற்படுத்திக்கொண்டே சென்றிருக்கிறார் அந்த போதை ஆசாமி. இதனால் ஆத்திரமடைந்த பொதுமக்கள், காரை விடாமல் துரத்திச் சென்று துரைப்பாக்கம் கஸ்டம்ஸ் காலனி பிரதான சாலையில் மடக்கிப் பிடித்தனர். காரை நிறுத்திய பொதுமக்கள், விபத்து ஏற்படுத்திய ஓட்டுநரை வெளியே இழுத்துப் பார்த்தபோது, சுயநினைவின்றி அளவுக்கு அதிகமாக போதையில் இருந்தது தெரியவந்தது. அதைப் பார்த்து கோபமடைந்த மக்கள் அவரது காரின் முன்பக்க கண்ணாடியை அடித்து நொறுக்கினர். தொடர்ந்து சம்பவம் குறித்து அடையாறு போக்குவரத்து புலனாய்வுப் பிரிவு காவல் நிலையத்திற்கு தகவல் கொடுத்தனர்.

இந்நிலையில், பாஸ்கரை கைது செய்த போலீசார், காவல் நிலையத்தில் வைத்து விசாரித்து வருகின்றனர்.