திமுக நிர்வாகியும், முன்னாள் மத்திய அமைச்சர் மு.க.அழகிரியின் தீவிர ஆதரவாளருமாக இருந்த மதுரையைச் சேர்ந்த எஸ்.ஆர்.கோபி, எதிர்க்கட்சித் தலைவர் எடப்பாடி பழனிச்சாமி முன்னிலையில் அதிமுகவில் தன்னை இணைத்துக் கொண்டார். ஏற்கனவே மதுரை முன்னாள் துணை மேயர் மன்னன், திமுகவிலிருந்து விலகி அதிமுகவில் இணைந்ததை அடுத்து, மதுரையின் முக்கிய திமுக முகமாக விளங்கிய எஸ்.ஆர்.கோபியும் இன்று தனது ஆதரவாளர்களுடன் சென்னை பசுமைவழிச் சாலையில் உள்ள எடப்பாடி பழனிசாமி இல்லத்தில் அவரை சந்தித்து அதிமுகவில் இணைத்துக் கொண்டார்.

தொடர்ந்து செய்தியாளர்களை சந்தித்த அதிமுக முன்னாள் அமைச்சர் செல்லூர் ராஜு, எஸ்.ஆர்.கோபி ஒரு சிங்கம் போன்றவர். தேர்தல் காலங்களில் எங்களையே மூர்க்கமாக எதிர்த்துப் பணியாற்றியவர். மதுரையில் திமுகவிற்காக அரும்பாடுபட்ட இவரைப் போன்றவர்கள் இன்று அங்கே மதிக்கப்படுவதில்லை என்றார். மேலும், மதுரை எப்போதும் அதிமுகவின் கோட்டைதான். மேலும், வரும் தேர்தலில் தென் மாவட்டங்கள் முழுவதையும் அதிமுக கைப்பற்றி, எடப்பாடி பழனிசாமி மீண்டும் முதலமைச்சராவது உறுதி என்றும், மதுரையில் உள்ள 10 தொகுதிகளிலும் அதிமுக வெற்றி பெறும்” என்றும் தெரிவித்தார்.

என்டிஏ கூட்டணியில் இணையும் என்று எதிர்பார்க்கப்பட்ட தேமுதிக, திமுக கூட்டணியில் இணைந்தது தொடர்பான கேள்விக்கு பதில் அளித்த அவர், யாரும் தங்கள் கூட்டணியில் இணைவார்கள் என்று நாங்கள் எதிர்பார்க்கவில்லை என்றும், வரும் கட்சிகளை வரவேற்க தயாராக இருந்ததாகவும் தெரிவித்தார். மேலும், கூட்டணி என்பது தேர்தல் அறிவித்த பிறகுதான் முழுமை அடையும் என்றும் தெரிவித்தார்.