தமிழக சட்டமன்ற தேர்தல் நடைமுறைகள் முடிவடையும் வரை, TN 2026 படம் வெளியிடப்படுவதை நிறுத்தி வைக்க தேர்தல் ஆணையத்துக்கு உத்தரவிடக் கோரிய வழக்கு வாபஸ் பெறப்பட்டது.

நடிகர் நட்ராஜ் நடிப்பில், உமாபதி ராமையா இயக்கத்தில் உருவாகியுள்ள படம் TN 2026. சமீபத்திய அரசியல் நிகழ்வுகளை அடிப்படையாக வைத்து எடுக்கப்பட்டுள்ள இந்த படத்தை, தேர்தல் நடைமுறைகள் முடியும் வரை நிறுத்தி வைக்க, தேர்தல் ஆணையத்துக்கு உத்தரவிடக் கோரி, வழக்கறிஞர் எம்.எல்.ரவி சென்னை உயர்நீதிமன்றத்தில் மனு தாக்கல் செய்துள்ளார்.

அந்த மனுவில், தேர்தல் நடத்தை விதிகள் அமலில் உள்ள நிலையில், TN 2026 படத்தை வெளியிட அனுமதித்தால், அது வாக்காளர்கள் மத்தியில் தாக்கத்தை ஏற்படுத்துவதுடன், நியாயமான தேர்தலையும் பாதிக்கும் என்பதால், தேர்தல் நடைமுறைகள் முடிவடையும் வரை படம் வெளியிடப்படுவதை நிறுத்தி வைக்க கோரி ஏப்ரல் 6 ஆம் தேதி அளித்த மனுவை, தேர்தல் ஆணையம் பரிசீலிக்கவில்லை எனத் தெரிவிக்கப்பட்டுள்ளது.

இந்த வழக்கு தலைமை நீதிபதி எஸ்.ஏ.தர்மாதிகாரி, நீதிபதி ஜி. அருள்முருகன் அமர்வு முன்பு விசாரணைக்கு வந்தது, அப்போது மனுதாரர் தரப்பில் ஏற்கனவே படம் திரையரங்கில் வெளியாகி விட்டதால் வழக்கு செல்லத்தக்கதல்ல என்பதால் வழக்கை திரும்ப பெறுவதாக தெரிவித்தார். இதை ஏற்று கொண்ட தலைமை நீதிபதி அமர்வு, மனு திரும்ப பெற அனுமதித்து, தள்ளுபடி செய்து உத்தரவிட்டனர்.